Os tráficos do porto de Vilagarcía manteñen a súa boa progresión a e as mercadorías medran un 25% nos dous primeiros meses do año 

O Porto de Vilagarcía pechou o mellor mes de febreiro das dúas últimas décadas, superando as 127.000 toneladas de tráfico portuario neste mes. O porto de Vilagarcía non alcanzaba as 120.000 toneladas de tráfico portuario nun mes de febreiro desde o ano 2005. Esta marca foi claramente superada, xa que durante o pasado mes, o total de tráfico portuario no noso porto foi de 127.531 toneladas.

Con relación ao comezo do pasado ano, o acumulado no movemento de mercadorías mostra un incremento porcentual do 25% ata peche de febreiro, unha subida moi destacada se temos en conta que o pasado ano, o Porto de Vilagarcía estableceu un récord histórico de tráficos portuarios a peche do exercicio. O total de tráfico portuario nos dous primeiros meses do ano ascende a 264.073 toneladas, fronte ás 210.563 toneladas contabilizadas entre xaneiro e febreiro de 2021. 

Na comparativa cos datos do sistema portuario, Vilagarcía é o terceiro porto con maior incremento porcentual dos seus tráficos a peche de febreiro, só por detrás dos portos de Málaga e Alacante, situándose entre os dez portos con maior crecemento relativo nas tres categorías de tráficos portuarios (graneis sólidos, graneis líquidos e mercadoría xeral). O porto arousán tamén superou amplamente o incremento medio do sistema en leste mesmo período, que foi do 9,24%. 

Por categorías, a mercadoría xeral representa algo máis da metade de todos os tráficos deste período, mentres que os graneis sólidos e líquidos achegan de maneira equitativa o restante volume de tráficos. Na categoría de mercadoría xeral, destaca o incremento no movemento de mercadoría contenerizada. O total de TEUs movidos a peche de febreiro foi de 5.675, o que supón un incremento do 7,8% con relación ao período xaneiro-febreiro do pasado ano, fronte ao lixeiro descenso, do 1,75%, que lanza a media do sistema. Estas cifras sitúan aos contedores no primeiro lugar por número de toneladas movidas nesta categoría, seguidos de taboleiro e aluminio. 

Impacto do paro no transporte 
Por outra banda, a Autoridade Portuaria de Vilagarcía está a experimentar o impacto do paro que afecta o transporte por estrada desde a pasada semana. A pesar de que as operativas de carga e descarga están a poderse realizar en xeral con normalidade, a non dispoñibilidade de transporte en camión está a provocar dificultades e atrasos nas entradas e saídas de mercadoría do recinto portuario desde o luns da pasada semana. No día de hoxe, estímase que as operativas de camións están en torno ao 30% do habitual. 

A pesar diso, as cifras provisionais de tráfico deste mes de marzo a día de hoxe apuntan a só un lixeiro descenso con relación ás rexistradas a peche do mesmo mes do pasado ano. 

Porto de Vilagarcía, 24 de marzo de 2022