A desafectación da parcela da antiga Comandancia formalízase en tempo récord
Os terreos serán adquiridos polo Concello de Vilagarcía para a súa cesión á Consellería de Sanidade con destino á creación dun centro de saúde
A tramitación administrativa necesaria para a creación na parcela da antiga Comandancia de Mariña do novo centro de saúde de Vilagarcía está a se realizar con gran axilidade, mellorando as previsións das administracións implicadas. O presidente da Autoridade Portuaria, José Manuel Cores Tourís, e o alcalde de Vilagarcía, Alberto Varela, realizaron o 25 de abril unha comparecencia conxunta para informar tanto os avances logrados ata a data como dos próximos pasos a dar no proceso que levará á creación dun novo centro de saúde neses antigos terreos portuarios.
O procedemento para a saída deses terreos do dominio público portuario iniciouse por acordo do Consello de Administración da Autoridade Portuaria do 21 de outubro de 2022, no que se aprobou a declaración de innecesariedade e o inicio do trámite de desafectación estes terreos. Unhas semanas despois, Concello e Autoridade Portuaria asinaban o convenio polo que a administración local pasaba a dispoñer dunha concesión sobre esa parcela, a cambio dun canon anual establecido nuns 50.000 euros (tras a aplicación das bonificacións correspondentes). Esta concesión expúxose como unha fórmula para facilitar que o Concello puidese facer uso da parcela sen esperar á súa desafectación, en previsión de que esta puidese prolongarse entre un e dous anos.
Tras culminar este trámite da desafectación (previos informes favorables tanto da Dirección Xeral da Costa e o Mar, como do organismo público Portos do Estado), queda unicamente pendente a notificación a Patrimonio do Estado para poder formalizar a venda. O prezo de venda da parcela será de 1.157.406,66 euros, de acordo coa valoración xa realizada por unha taxadora independente. O presidente da Autoridade Portuaria manifestou a súa intención de elevar ao Consello a proposta de venda da parcela en maio, de tal maneira que a operación podería formalizarse no mes de xuño.
A finalidade última é poñer estes terreos ao dispor do Sergas, para a creación dun novo centro de saúde en Vilagarcía, un proxecto no que a administración autonómica xa está a traballar activamente.
Tanto o presidente da Autoridade Portuaria como o alcalde de Vilagarcía expresaron a súa satisfacción pola axilidade coa que se produciu este trámite, así como pola excelente coordinación entre as diferentes administracións implicadas, que está a permitir avanzar en todos os pasos previos á creación do centro de saúde con gran celeridade.
Porto de Vilagarcía, 25 de abril de 2022.
A Autoridade Portuaria de Vilagarcía impulsa unha mostra fotográfica virtual e colaborativa como homenaxe ante a crise do COVID-19
Recoller e compartir as experiencias cidadás en relación coa crise sanitaria do COVID-19 é o obxectivo que se expón a Autoridade Portuaria de Vilagarcía coa organización de “Contra vento e marea".
O Porto de Vilagarcía mantén a súa operatividade e implementa medidas de apoio á comunidade portuaria
O Porto de Vilagarcía mantén a súa operatividade ao servizo da cidadanía e de toda a sociedade. Os portos de Interese Xeral do Estado son infraestruturas estratéxicas garantes do funcionamento de servizos que se definen como esenciais.
O Porto de Vilagarcía rexistra en 2019 o mellor balance de tráficos da súa historia, cun incremento do 8,9% con relación ao ano anterior
A Autoridade Portuaria de Vilagarcía pechou o exercicio 2019 co mellor balance de tráficos da súa historia, establecendo un novo máximo anual de movemento de mercadorías.