O porto de Vilagarcía recibe hoxe ao primeiro dos dous cruceiros previstos para esta fin de semana
Desde primeira hora da mañá está atracado en Ferrazo Norte o National Geographic Explorer. O domingo espérase ao Island Sky
O porto de Vilagarcía recibe hoxe ao primeiro dos dous cruceiros previstos para esta fin de semana. Esta xornada festiva do 17 de maio, Día das Letras Galegas, visítanos o National Geographic Explorer, cun centenar de pasaxeiros a bordo. Trátase dun cruceiro de 112 metros de eslora e bandeira de Gran Bahamas, que fixo a súa entrada en porto á primeira hora da mañá, e cuxa saída está prevista para as 18.00 horas. O seu peirao de atracada é Ferrazo Norte.
O National Geographic Explorer está a realizar un itinerario de 13 días de duración, que comezou en Barcelona e continuou con escalas en Valencia, Cartaxena, Motril, Málaga, Portimao, Lisboa e O Porto, que foi a escala inmediatamente anterior á de Vilagarcía. Esta tarde, cando abandone Vilagarcía, o cruceiro poñerá rumbo a Pasaxes, onde está programada a penúltima parada neste itinerario antes de finalizar o seu percorrido en Bordeus, o vindeiro luns día 20 de maio.
O domingo está programada a chegada doutro cruceiro en Vilagarcía. Trátase do Island Sky, un cruceiro da navieira Nobre Caledonia, que está a realizar un itinerario entre os Azores e as Illas Británicas. Tras comezar a súa travesía o 9 de maio e realizando escalas en varias das illas que integran o arquipélago dos Azores, o buque –con bandeira de Gran Bahamas e 90 metros de eslora- chegará a Vilagarcía ás 14.30 horas do domingo, dando oportunidade á súa pasaxe –composta por un centenar de persoas- de descubrir a riqueza patrimonial da nosa comarca mediante a visita a un pazo. A saída do buque con destino á Coruña está prevista ás 19.30 horas.
Tanto na escala de hoxe como na do domingo, a Autoridade Portuaria pon ao dispor de tripulación e pasaxe un servizo lanzadeira entre o peirao e o centro urbano, a fin de facer máis cómoda a súa estancia en Vilagarcía. Tamén se habilita a pé de peirao un punto de atención ao visitante prestado por persoal da propia Autoridade Portuaria.
Porto de Vilagarcía, 17 de maio de 2024.
Autoridade Portuaria e Concello traballarán conxuntamente para a posta en valor do Peirao de Pasaxeiros
A Autoridade Portuaria e o Concello de Vilagarcía celebraron unha reunión na que se abordaron iniciativas de interese para a cidadanía, como é a potenciación do Peirao de Pasaxeiros e o antigo Club de Mar como referentes do turismo náutico.
Boluda e Aceites Abril reforzan a súa aposta polo porto de Vilagarcía coa ampliación da superficie das súas respectivas concesións
O Consello de Administración da Autoridade Portuaria de Vilagarcía celebrou o día 31 de xullo unha sesión ordinaria na que se deu luz verde a dous proxectos para a ampliación de concesións portuarias.