O Porto de Vilagarcía supera a peche de agosto o millón de toneladas de tráficos e crece un 9,5% con relación ao ano 2021
O movemento de mercadorías en agosto roza as 124.000 toneladas. A mercadoría xeral supuxo case o 52% de todos os tráficos portuarios.
O Porto de Vilagarcía continúa na senda de crecemento de tráficos portuarios, e pecha o oitavo mes do ano cun incremento porcentual acumulado do 9,5% con relación ao período xaneiro-agosto de 2021. Grazas a iso, o porto arousán supera o millón de toneladas movidas nos oito primeiros meses do ano. Concretamente, o tráfico portuario ascende a 1.057.995 toneladas, segundo datos provisionais da Autoridade Portuaria.
É a primeira vez na historia que o porto arousán consegue superar a cifra do millón de toneladas a peche do segundo cuadrimestre do ano. O pasado ano, que concluíu con récord histórico de tráficos no porto de Vilagarcía, movéronse a estas alturas do exercicio unhas 92.000 toneladas menos que neste 2022 (965.646 toneladas de tráfico portuario acumulado entre xaneiro e en agosto de 2021 fronte ás xa mencionadas 1.057.995 toneladas do mesmo período deste ano).
Por categorías, a mercadoría xeral representa aproximadamente o 52% de todo o tráfico portuario, alcanzando a cifra de 551.191 toneladas no acumulado a peche de agosto. Cabe apuntar o positivo comportamento dos contedores, cuxo movemento se incrementa un 3% en número de TEUS, sendo o total neste apartado de case 23.000 TEUs movidos desde comezo do exercicio. O aluminio continúa a positiva evolución que vén caracterizando todo o ano, mentres que o taboleiro sitúase lixeiramente por baixo dos seus rexistros en comparación co mesmo período do pasado ano. Porcentualmente, o incremento no movemento de mercadoría xeral con relación aos oito primeiros meses de 2021 foi do 4,2%. En canto aos graneis, tanto os sólidos como os líquidos melloran tamén os seus rexistros do período xaneiro-agosto de 2021 e superan conxuntamente o medio millón de toneladas movidas.
O presidente da Autoridade Portuaria, José Manuel Cores Tourís, destaca o excelente labor desenvolvido por toda a comunidade portuaria arousá, clave para que o porto pechase o terceiro mellor peche de agosto, en canto a tráficos mensuais, das dúas últimas décadas. O mes que acaba de concluír terminou con 123.961 toneladas de mercadoría, das cales corresponderon a graneis líquidos 17.646 toneladas, a graneis sólidos, 57.509 toneladas e finalmente á mercadoría xeral, 48.806 toneladas.
Estas cantidades, sumadas ás cifras de xuño (mes que se pechou con récord mensual de movemento de mercadorías) e xullo (no que se bateu o récord establecido o mes inmediatamente anterior, superándose as 155.000 toneladas de mercadoría movidas no mes) fixeron posible este destacado incremento porcentual no acumulado dos oito primeiros meses do ano.
Porto de Vilagarcía, 1 de setembro de 2022
Porto de Vilagarcía pecha o mellor primeiro semestre do ano de toda a súa historia, superando as 775.000 toneladas de tráficos
As cifras de xuño, con máis de 150.000 toneladas de mercadoría, impulsaron os rexistros do primeiro semestre deste exercicio
A Autoridade Portuaria aproba a cesión ao Concello de Vilagarcía dunha nave para actividades e ensinanzas náuticas y deportivas
Tamén se iniciou o procedemento para a venda á administración local da antiga Comandancia, unha vez aprobada a súa desafectación
A Autoridade Portuaria de Vilagarcía renova a súa colaboración coa Fundación Galega contra o Narcotráfico
O presidente do Porto, José Manuel Cores Tourís, reuniuse esta mañá co presidente e o xerente da Fundación