Porto de Vilagarcía pecha o mellor primeiro semestre do ano de toda a súa historia, superando as 775.000 toneladas de tráficos
As cifras de xuño, con máis de 150.000 toneladas de mercadoría, impulsaron os rexistros do primeiro semestre deste exercicio
O Porto de Vilagarcía acaba de pechar o mellor primeiro semestre do ano de toda a súa historia, cun tráfico portuario total de 775.731 toneladas. A cifra supera nun 6,2% os rexistros do porto arousán a peche de xuño de 2021, ano no que porto bateu o seu récord histórico de movemento de mercadorías, ao rematar o exercicio con máis de 1,5 millóns de toneladas movidas.
A este excelente resultado contribuíron en gran medida as cifras de xuño, mes no que os tráficos portuarios de Vilagarcía superaron as 156.000 toneladas, o que supón tamén un récord mensual de movemento de mercadorías polos peiraos do porto arousán. A cifra supón unhas 6.000 toneladas máis que o anterior máximo mensual de movemento de mercadorías, establecido en setembro de 2021.
Por categorías, no apartado de graneis sólidos movéronse, nos seis primeiros meses do ano, un total de 173.272 toneladas. Os graneis líquidos, pola súa banda, pechan o semestre cun total de 161.783 toneladas movidas. Finalmente, a categoría de mercadoría xeral continúa encabezando de maneira moi destacada o balance de tráficos portuarios, xa que o total de toneladas movidas neste apartado supera o total de graneis (sumando sólidos e líquidos).
A mercadoría xeral movida entre xaneiro e xuño polos peiraos arousáns achega un total de 436.814 toneladas ao balance de tráficos portuarios, o que representa un incremento porcentual do 9,4% con relación ás cifras do pasado ano. Desta cantidade, 151.266 toneladas corresponden ao movemento de contedores, equivalentes a 17.435 TEUs. O incremento porcentual no movemento de TEUs con respecto ao primeiro semestre de 2021 foi do 6,2%.
En canto á mercadoría xeral convencional, suma 285.548 toneladas a peche de xuño, co aluminio e o taboleiro como os produtos que achegan maior número de toneladas nesta categoría. Unha cifra destacable é que nunca con anterioridade a Autoridade Portuaria de Vilagarcía movera máis de 400.000 toneladas de mercadoría xeral nun primeiro trimestre do ano, e só en catro ocasiones superara as 300.000 toneladas nesta categoría no período xaneiro-xuño.
Porto de Vilagarcía, 15 de xullo de 2022
O Porto dá o seu visto e prace ao proxecto de Turismo de Galicia para a execución da mellora do Faro de Sálvora
Aprobouse tamén un proxecto para mellora das naves do Ramal que ten en concesión a Organización Empresarial Parquistas de Carril
O Porto recibe a visita de xubilados e de alumnos do ciclo de Transporte e Loxística, e do ciclo superior de Xestión de Vendas
As visitas permiten aos participantes coñecer o funcionamento do porto mediante unha presentación e un percorrido en autocar polo recinto portuario
O Porto bate o seu récord de tráficos a peche do terceiro trimestre do ano, con máis de 1,1 millóns de toneladas
Mellóranse nun 0,5% os resultados do mesmo periodo do pasado exercicio